SRG SSR

Dieta naziunala 2015

Nossa contribuziun a la democrazia

La quarta Dieta naziunala da la SSR che ha gì lieu ils 25 da settember 2015 a Coira ha la societad regiunala SRG Svizra Rumantscha organisà. Il tema da la dieta è stà la contribuziun da la SRG SSR a la democrazia.

Represchentants da tut las quatter regiuns linguisticas ed enconuschiders da la branscha èn s'occupads da la dumonda, co che la purschida da program da la SRG SSR realisescha l'incumbensa democratica da Constituziun, parlament e Cussegl federal. Tenor la concessiun dal Cussegl federal sto la SRG SSR contribuir a la furmaziun libra da l'opiniun dal public cun metter a disposiziun infurmaziuns variadas ed objectivas.

Quest’incumbensa è cumplexa tant sin nivel da la politica sco da la cultura e sto adina puspè vegnir interpretada e communitgada da nov. En opposiziun ad auters servetschs da service public sco la posta, la telecommunicaziun u il traffic public saja il service public tar las medias electronicas pli grev da mesirar, ha manegià Walter Thurnherr, il secretari general dal Datec . La fixaziun dal service public audiovisual en Svizra saja ina dumonda dal punct da vista, e quai pretendia blera mesira ad egl. Per il Datec fetschia per exempel in scumond absolut per far reclama tar la SRG SSR betg senn, en spezial perquai ch’el mainia tar ina diminuziun nungiavischada da las finanzas. Plinavant na duai la SRG SSR betg vegnir transfurmada en in simpel furnitur da cuntegn («Content Provider»). Thurnherr ha numnà las contribuziuns localas e regiunalas sco elements centrals per la furmaziun da l’opiniun dal public. Tschertas purschidas da program dastg’ins dentant metter en dumonda e la SRG SSR duaja esser averta per quella critica. La SRG SSR è ina part impurtanta da la diversitad mediala en Svizra, e quella saja fundamentala per ina democrazia che funcziunescha.

Martin Schulz, il president dal parlament d'Europa, è sa drizzà en in messadi da video a la dieta ed ha intunà ch'ina radiotelevisiun da dretg public, segirada finanzialmain, saja «indispensabla». Tenor Schulz haja l'anteriur derschader administrativ tudestg Dieter Grimm tutgà la noda cun dir ch'ina radiotelevisiun publica saja necessaria, «pertge ch'ina radiotelevisiun commerziala che viva da la reclama e sto far in program lasuenter na contribuescha betg avunda a la furmaziun libra da l'opiniun dal public».

«Schurnalists duessan avair dapli ambiziuns ch’ina maschina da retschertga»

Sin quai ha la chauredactura dal WDR, Sonia Mikich, fatg attent sin las difficultads da la lavur dal mintgadi tar la medias d’ozendi. I domineschia in «fetischissem per la sveltezza che ans rendia adina pli infurmà, senza dentant vegnir pli scort.» Per Mikich sajan perquai reportaschas approfundadas muments-staila da la radiotelevisiun publica. Quai constettia oravant tut tar il schurnalissem investigativ e tar las reportaschas da l’ester. «Schurnalists duessan avair dapli ambiziun ch’ina maschina da retschertga», di Mikich, senza emblidar il squitsch da spargnar che pertutga er la radiotelevisiun publica. Quella ha però il privilegi da betg stuair far plaschair als pussants. Cunquai ch’ella sa drizza a tuts stettia ella per integraziun en in temp cura che blers prefereschian da sa barattar cun persunas da medema opiniun.

Cun agid da differents exempels da la purschida da programs (emissiuns d'elecziuns e votaziuns, emissiuns da l'actualitad dal di, debattas, documentaziuns) han ils chauredacturs da la SRG SSR illustrà quant enavant che quella resguarda cun success sia rolla da mediatura tranter process democratics ed il public. Discutadas èn vegnidas tge offertas che promovan la democrazia e co che la SRG SSR chatta novs access a ses public. En spezial è vegnì menziunà il project  «politbox» per las elecziuns 2015 che duaj permetter da cuntanscher in public giuven «cun discussiuns da e cun giuvens e betg mo sur dals giuvens.»

Represchentants da la societad purtadra da la SRG SSR han lura approfundà las enconuschientschas ed identifitgà las mancanzas e ristgas pertutgant las pretensiuns envers la SRG SSR. Ultra da quai è vegnì mussà il film «Die Demokratie ist los» da Thomas Isler, che sa fatschenta en moda critica cun ils instruments da la democrazia directa en Svizra.

Walter Thurnherr – La democrazia dovra medias. Tgeninas?

Walter Thurnherr è naschì 1963 a Muri (AG). El ha terminà ses studi da la fisica teoretica a la SPF Turitg, 1989 è el entrà en il servetsch dal Departament da l’intern.  Da 1991 a 1995 ha el lavurà en il stab da planisaziun da la politica exteriura a Berna. En il rom dal presidi da la OSCE ha el represchentà la Svizra tar l’intermediaziun en il conflict da Nagornij-Karabach. 1997 – 1999 è el sta il collavuratur persunal da cusseglier federal  Flavio Cotti, lura minister da la partiziun politica VI, fin ch’el è vegnì elegì il matg 2000 sco ambassadur e schef da quella partiziun.Da 2003 a 2010 è el sta secretari general dal Departament federal d’economia publica. Dapi il schaner 2011 è Walter Thurnherr secretari general dal Departament d’ambient, traffic, energia e communicaziun (ATEC).

 

Martin Schulz – Senza medias nagina democrazia

Martin Schulz è naschì 1955 a Hehlrath, en vischinanza dal cunfin tudestg-beltg-ollandais. Suenter avair terminà la scola ha el fatg in emprendissadi da librari. Cun 19 onns è el entrà en la SPD. Cun 31 onns – el era quella giada il president da citad il pli giuven dal Rain dal nord-Vestfalia – è el vegnì elegì sco president da sia citad patria Würselen. Da 1994 a 2012 è Martin Schulz stà commember dal parlament da la UE ed ha lavurà en pliras cumissiuns, sco p.ex. la cumissiun per ils dretgs umans e  las cumissiun da l’intern e da giustia. Dapi il schaner 2012 è el president dal parlament d’Europa (el è vegnì reelegì il fanadur 2014). Martin Schulz ha survegnì 2015 il Premi da Carl.

Sonia Seymour Mikich – Collavuraturs da medias e la democrazia. Experientschas, aspectativas, speranzas!

Sonia Seymour Mikich è naschida 1951 ad Oxford e creschida si a Londra.  Ella ha studegià politologia, sociologia e filosofia a la scol’auta tecnica dal Rain dal nord-Vestafalia ad Aachen. Ella ha lavurà a partir da 1992 sco correspundenta dal WDR,per cumenzar a Moscau, a partir da 1998 a Paris sco manadra dal studio da l’ARD.  Da 2002 a 2012 ha ella manà la redacziun dal magazin politic da l’ARD «Monitor» ed era er la manadra da la gruppa da program «Inland Fernsehen» dal radio da la Germania dal vest (WDR) a Cologna. Dapi l’entschatta 2014 è ella la chauredactura da WDR.1998 ha ella survegnì la Crusch da merits da la federaziun tudestga (Bundesverdienstkreuz), 2012 ha la revista professiunala «Medium Magazin» numnà ella schurnalista da politica da l’onn.

RSIRTRRTSSRFSWI